Katba synñia ka nang tap lup,
Ïa Ri Khasi ba ieit jong ngi,
Katta ki khlur ki nang ïai paw
Jingmaham b'la slem bah jong phi.
Ki jingphohsniew ba pashat jngai,
Kum mawbynna ha syngkhlieh thiah,
Lyngkor bym don ba kitkhlieh lem,
Ha lade hi phi shim ban bah.
U khulom te bad phi mynshwa,
U sngewthuh lut kaei phi mut,
Lynti ba ïaid ki khun ka Ri.
U la dep tip haei kan kut.
Ko 'peh sylli ko 'tiew dohmaw,
Satang ki jingpyrto ki nam,
Jingstad maïan d'u Blei la bsut,
Hapoh jong phi ko Soso Tham.
-Mebatei L. Khongsti
"U Soso Tham" is an original Khasi poem by @mebatei_l_khongsti 😄 Khublei Shibun for sending your poem! 🙏
@mebatei_l_khongsti says "Nga shong nga sah ha shnong Laitlyngkot bad nga la sdang ban thoh poetry naduh ba nga dang leit skul hynrei ba nga da ieit bad da pynleit jingmut shisha ban thoh kadei naduh ka por ba nga shong class 12 da ka jingaimynsiem iwei i nonghikai jong nga. Nga ju thoh ki poetry Khasi kumjuh ruh ka phareng hynrei nga kham shimkhia ia ka ba dei ka ktien lajong. Nga shait post ki poems jong nga ha WhatsApp status bad ha Instagram hynrei nga angnud hi ba ha kawei ka sngi ngan sa ïoh ban pynmih da ka kot."
Mynta ka taïew ngin kynmaw ïa ka lyngkhuh sngi ïap jong u myllung ba radbah ka ri Khasi u Soso Tham ha ka 18 tarik u Nohprah 1940, da kaba ngin post ïa ki poitri ba lah noh synniang da ki paralok followers jong ngi. ✒️📃✏️
Ai ba ka jingshem mynsiem, ka jingshemphang bad ka jingieit ri jong u myllung Soso Tham, kan long ruh ka jingïohkynti jong ngi ka ban pynkhlaiñ ïa ngi kum ka jaitbynriew. 🌄🌤️
This week we commemorate the death anniversary of Khasi Poet Laureate U Soso Tham, on the 18th of December 1940, by posting poetry that has been generously contributed by our dearest followers. ✒️📃✏️
May the inspiration, conviction, wisdom and love for the Khasi land and people of the poet U Soso Tham be our inheritance that strengthens us as a community. 🌄🌤️