"Naiwieng" by Badondor Diengdoh

Naiwieng

Ka jngum thylli U Naiwieng

nalor suiñbneng

ka pyrshang ban kjit noh ïa ka

kyrteng jong phi napoh

shadem jong nga.

Ka lah mo ban ban leh kumta-

lehse ka bishni ne?

Haba hangne nga lah ngam

naduh ryndang

shaduh shiteng sla khyndew,

ban poi sha kliar slakjat

ka mynsiem jong phi.

Teng teng haba nga per

harud ka um,

bad par hapoh ki syrngiew maw

kum ka tyngab ba shah dung

da u ñiuhkseh, ban leit phai noh

sha la skum bad ka jingkletnoh;

bad 'la u ksaiñ ha shyntur-

nga khie biang pat ryngkat

bad ki jingkynmaw.

Sngew tieng haba wat ka um

ka kjit ïa ki jingmut thwei.

Sngew par ñiangkhriat

haba teng teng wat u rnga u

sah ïong, u sah bthi-

tangba ka kamra ka syaid

bad ka rhem tang da ka um.

Sngew thylli

ban dei u briew,

ban dei u mrad,

ban dei u jingthaw

uba long kum u maw

hapoh krem;

ban shah pruid dak

hapdeng bad hapoh ka dum-

wat la tang hapoh san

ne shiphew kam,

ka syaid bad ba shai

ka pynsmiej ia nga.

Ban klet noh te ka suk,

lada don ki jingpynbyrngia:

ka ding ka phalang ïa ka

lawei kaba khlem urlong;

ka mat bam duh shi syndon-

teng teng ka ding ka

hap ban bam,

khnang ba kan ïai

im harud ka um.

Ban klet noh ruh ka jynjar,

lada ka jingkynjah jong ka miet

ka lynñiar lyngba ki khlur

kiba phi ju kdew bad pyni ïa nga

ha ki por ba dang dei u briew

uba dap tang da ka jingkmen suda.

- Badondor Diengdoh

Mynta ka taïew ngi kynmaw ïa ka lyngkhuh sngi ïap jong u myllung ba radbah ka ri Khasi u Soso Tham ha ka 18 tarik u Nohprah 1940, da kaba ngin post ïa ki poitri ba lah noh synniang da ki paralok followers jong ngi. ✒️📃✏️ Ai ba ka jingshem mynsiem, ka jingshemphang bad ka jingieit ri jong u myllung Soso Tham, kan long ruh ka jingïohkynti jong ngi ka ban pynkhlaiñ ïa ngi kum ka jaitbynriew. 🌄🏞️ This week we commemorate the death anniversary of Khasi Poet Laureate U Soso Tham, on the 18th of December 1940, by posting poetry that has been generously contributed by our dearest followers. ✏️📃✒️ May the inspiration, conviction, wisdom and love for the Khasi land and people of the poet U Soso Tham be our inheritance that strengthens us as a community. 🌄🏞️ Today we have an original Khasi poem entitled " 'Naiwieng" by Badondor Diengdoh @a_pocketful_of_plums Khublei Shibun for sending your beautiful poem! 😄😄 @a_pocketful_of_plums says: "A great poem will reel you into its world and capture your imagination...Poetry needs to be read and absorbed. Most poems need to be read many times. A finished poem is always half finished. It only becomes complete with the interpretation of the reader...Ultimately, I hope to write poetry for the individual, for identity and for the community..."