Kmen ha jingitynnad jong ka sngi,
Naba ngim tip kaei ban wan ha lynti.
Shim ka por jingiwbih ki syntiew ban sieng,
Ban ring bad pynhiar mynsiem khlem jingsheptieng.
Pynleit jingmut ruh ia ki ding ki ba ieng,
Kmen kum lyer jai jai ba beh kylleng kylleng.
Shim ia u khynnah hikai bad btin lynti,
Ha ki jaka ba kynjah ban sneng bad pyni
Pyniaid ha ki shyiap ka rud duriaw bah:
Hikai ha ki at phyllung jingtriem ba un lah shah.
Pyni ruh ha u jingitynnad ka suiñbneng,
Shah un kylli, jubab wat ym leh meng.
Ai un iohi ia ki lum bah makashang,
Krem barieh, ki wahduid bad um shyngiar ba bang.
Pynithuh ki mrad bad ki sim ha ka ri,
Batai de ba un ym sah biej u bapli:
Ka dei ka jingshisha! Watla pyrthei ka ma,
Bun ruh jingitynnad ba ngin shem ha ka.
Jingitynnad ka jingim ba la pynman kyrpang,
Ki jingkhraw, jingmaian, shoh mynsiem ka phalang
Kumno shaphang u bnai bad ki khlur ha sahit,
Hapdeng ka dum iong ngit phalang jingshai barit;
Kamram ka dawa ha ngi ban kut jingmut,
Ban ieit ia ki donkam ban aiti lut;
Jingieit long shabi ha man la ka ri,
Ngi donkam ruh ban tip kumno ban ieng sakhi.
Lada ngi nang pyni tang ka jingijli, jingsniew kan khie im,
Jingieit kan nang ring sti.
- P. Tariang
"Ki Sakhi" is an original Khasi poem by @the_dark_linen_ ✒️🏞️🌲 Khublei Shibun for sending your poem! 😀🙏 Ka long kaba kit jingmut bha bad kaba don jinghikai.